La poesía: dulce don divino

Pero con todo esso mucho mayor viçio é plaser é gasajado é conportes rresciben é toman los rreyes é prínçipes é grandes señores, leyendo é oyendo é entendiendo los libros é otras escripturas de los notables é grandes fechos passados, por quanto se claryfica é alunbra el ssesso, é se despierta é ensalça el entendimiento, é se conorta el alma, é se glorifica la discreçion, é se governan é mantienen é repossan todos los otros sentydos, oyendo é leyendo é entendiendo é sabiendo todos los notables é grandes fechos passados que nunca vyeron nin oyeron nin leyeron, de los quales toman é rresciben muchas virtudes é muy sabyos é provechosos exenplos, commo sobredicho es. E por quanto á todos es çierto é notorio que entre todos los libros notables é loadas escripturas que en el mundo fueron escriptas é ordenadas é fechas é conpuestas por los sabios é discretos attores, maestros é conponedores d'ellas, el arte de la poetrya é gaya çiençia es una escryptura é conpusycion muy sotil é bien graçiosa, é es dulçe é muy agradable á todos los oponientes é rrespondientes d'ella, é componedores é oyentes.

 

La qual çiençia é avisaçion é dotrina que d'ella depende, é es avida é rreçebida é alcançada por graçia infusa del señor Dios, que la dá é la enbya é influye en aquel é aquellos que byen é sabya é sotyl é derechamente la saben fazer é ordenar é conponer é limar é escandir é medir por sus pies é pausas, é por sus consonantes é sylabas é açentos, é por artes sotiles é de muy diversas é syngulares nonbranças. E aun asymismo es arte de tan elevado entendimiento é de tan sotil engeño, que la non puede aprender nin aver alcançar nin saber bien nin commo deve, salvo todo omme que sea de muy altas é sotiles invençiones, é de muy elevada é pura discreçion, é de muy sano é derecho juysio, é tal que aya visto é oydo é leydo muchos é diverssos libros é escripturas, é sepa de todos lenguajes, é aun que aya cursado cortes de rreyes é con grandes señores, é que aya visto é platicado muchos fechos del mundo, é finalmente que sea noble, fydalgo é cortés é mesurado é gentil é graçioso é polido é donoso, é que tenga miel é açucar é sal é ayre é donayre en su rrasonar, é otrosý que sea amado é que siempre se preçie é se finja de ser enamorado, porque es opynion de muchos sabyos que todo omme que sea enamorado, conviene á saber que ame á quien deve é commo deve é donde deve, afirman é disen qu'el tal de todas buenas dotrinas es dotado.

📔 Juan Alfonso de Baena, en el prólogo del Cancionero de Baena (c. 1430)